အွန်လိုင်း အင်အားကြီး ကုမ္ပဏီတစ်ခု ဖြစ်သော Amazon.com သည် မိုဘိုင်းပစ္စည်း ဈေးကွက်တွင် ဝင်ရောက်ယှဉ်ပြိုင်ရန် ကြိုးပမ်းမှုတစ်ရပ် အနေဖြင့် စမတ်ဖုန်း ထုတ်လုပ်တော့မည်ဖြစ်ကြောင်း အမေရိက ရှိ မီဒီယာများက ဖော်ပြသည်။ Amazon သည် တရုတ်ထုတ်လုပ်ရေး ကုမ္ပဏီဖြစ်သော Foxconn နှင့် ပူးပေါင်းကာ စမတ်ဖုန်း ထုတ်လုပ်ရန် စီစဉ်နေ ကြောင်း သိရသည်။ စမတ်ဖုန်း ထုတ်လုပ်ရာတွင် မူပိုင်ခွင့် ချိုးဖောက်မှု မဖြစ်စေရန် ကာကွယ်မှု တစ်ရပ် အနေဖြင့် အဆိုပါ ကြိုးမဲ့ နည်းပညာကို မူပိုင်ခွင့် မှတ်ပုံတင် ရရှိနိုင်ရန် ကြိုးပမ်းလျက် ရှိသည်ဟု ဆိုသည်။ သို့သော် ထိုဖုန်း မည်သည့်အချိန်တွင် ထွက်ရှိလာမည်ကို အသေးစိတ် မသိရသေးပေ။ Kindle Fire Tablet ကဲ့သို့သော Amazon ၏ ထုတ်ကုန်ပစ္စည်းများအပြင် ကိုယ်ပိုင်ဟန်နှင့် ထုတ်လုပ်မည့် စမတ်ဖုန်းသည်လည်း ဒစ်ဂျစ်တယ်စာအုပ်၊ တေးသီချင်းနှင့် ရုပ်ရှင်များမှ ဝင်ငွေရရှိသည့် အတိုင်းပင် အဆိုပါ Hardware ထုတ်ကုန်ဖြင့် Amazon သည် ငွေကြေးများ ရရှိလာနိုင်ဦးမည်။ Amazon သည် စမတ်ဖုန်း ဈေးကွက်သို့ ထိုးဖောက်ရန် အခွင့်အရေး ရှိသော်လည်း အခက်အခဲ များစွာဖြင့် ရင်ဆိုင် ကြုံတွေ့နိုင်သည်ဟု ဆိုသည်။

ဝေနိုင်