ပုဂံသို့ ဘုရားဖူးရောက်နေသည့် ဒေါ်အောင်ဆန်းစုကြည်သည် ဒုတိယမြောက်နေ့ဖြစ်သည့် အင်္ဂါနေ့ ညနေပိုင်း တွင် နိုင်ငံကျော် ရွှေပါရမီတောရ ဆရာတော် အရှင်ဆန္ဒာဓိကနှင့် ၁ နာရီခန့်ကြာ တွေ့ဆုံဖူးမျှော်ခဲ့သည်။

သက်တော် ၄၃ နှစ်အရွယ်ရှိ အရှင်ဆန္ဒာဓိကသည် တိုက်ဆိုင် စွာ ဟိုတယ် တခုတည်းတွင် တည်းခိုနေသည့် ဒေါ်အောင် ဆန်းစုကြည်အား တွေ့ဆုံလိုသည်ဟု လုံခြုံရေးတာဝန် ယူပေးနေသည့် အဖွဲ့များက ပြောသည်။

“ဟိုတယ်မှာဆုံတာ အရှင်ဆန္ဒာဓိကကလည်း ဒေါ်အောင်ဆန်းစုကြည်ကို အမေစု လို့ အသုံးအနှုန်းမျိုးနဲ့ ခေါ်ပြောတာတွေ အဲဒီလို အသုံးအနှုန်းတွေ သုံးတာ တွေ့တယ်။

ထူးထူးခြားခြားကြီး တွေ့ဆုံတာမျိုးတော့ မဟုတ်ပါဘူးဗျာ … ဆရာတော်က တွေ့ချင်တယ်ဆိုတာနဲ့ ဖူးဖြစ်သွားတာ” ဟု တာဝန်ဖြင့် လိုက်ပါသွားသူ တဦးက ပြောသည်။

ဒေါ်အောင်ဆန်းစုကြည်အား မိန့်ကြားမှုများကို ကြားသိခွင့် မရခဲ့ဟု ဆိုသည်။

အရှင်ဆန္ဒာဓိကသည် ရေနံချောင်းဇာတိဖြစ်ပြီး တရားဟောခြင်းနှင့် ဓမ္မစာများ ရေးသားခြင်းတို့ကြောင့် နိုင်ငံအဝှမ်း လူသိများသည်။

ညနေ ၆ နာရီခွဲခန့်တွင် ဒေါ်အောင်ဆန်းစုကြည်သည် ပုဂံမြို့သစ် ရပ်ကွက်ရှိ ဦးဘငြိမ်း ယွန်းထည်ဆိုင်သို့ သွား ရောက်ကာ ပုဂံအမှတ်တရ ယွန်းထည် ပစ္စည်းများ ဝယ်ယူ သည်။ ထိုမှတဆင့် Bagan House ယွန်းထည် အလုပ်ရုံသို့ သွားရောက် လေ့လာခဲ့ပြီး ယခုသတင်းပေး ပို့ချိန်တွင် တည်းခိုရိပ်သာသို့ ပြန်သွားပြီ ဖြစ်သည်။

ဒေါ်အောင်ဆန်းစုကြည်သည် ပုဂံမြို့ သရပါ တံခါးအနီးရှိ ဝါးတော ကျောင်းတိုက်သို့ သွားရောက်ကာ ကျောင်းထိုင် ဆရာတော်ကို သင်္ကန်း ကပ်လှူခဲ့သေးသည်။ ထိုအပြင် ထိုကျောင်းတိုက်ရှိ ကိုရင်လေးပါးအား ပဉ္ဖင်း ဝတ်နိုင်သည့် အသက်အရွယ်အထိ ပစ္စည်းလေးပါး ဒါယိကာမ အဖြစ်ခံ ယူခဲ့သည်။

 

 ဒေါ်အောင်ဆန်းစုကြည်လက်မှတ် တောင်းခံကြစဉ်