Nail fungal infection လက်သည်းမှို
အမျိုးသမီး (၃၁ နှစ်)။ ပြည်ပမှာဆိုတော့ ရောဂါ ဖြစ်လို့ ဆေးခန်း သွားရင် သေချာ မပြောပြတတ်တော့ မသက်သာဘူး။ စဖြစ်တာက လက်သည်းရဲ့ ထိပ်ပိုင်းဘေး တဖက်စီမှာ လက်စွယ် ငုတ်သလို ဖြစ်နေတော့ ခွာထုတ်တာ၊ အပေါက်တွေက ချိုင့်ခွက်လေးလို ဖြစ်နေတာ။ ခုဆို လက် ၅ ချောင်းလုံးပဲ။ လက်သည်း ပိုးများလား မသိဘူးတဲ့။ ခွာနေတုန်းကတော့ သွေးကြောအမျှဉ်လေးလို နီနီလေးတွေ့လို့ ခွာထုတ် တိုင်းလဲ ပြန်ပေါ်လာတယ်တဲ့။ ပေးတဲ့ ဆေးနဲ့လဲ မသက်သာတော့ ကြားဖူးနား၀ ဖယောင်း စက်ချပြီး လုပ်ကြည့် တော့လဲ မသက်သာပါဘူး။
လက်သည်း-ခြေသည်းကို မှို၀င်လာရင် အစမှာတော့ ဖြူ-၀ါ၀ါ အစက်အပျောက်လေး ဖြစ်လာပြီး နောက် တော့ အောက်ထဲ ၀င်လာလို့ အရောင်ပြောင်းလာ၊ ထူလာ၊ ကျွတ်ဆတ်လာ၊ ပုံပြောင်းလာမယ်။ ကုရတာ မလွယ်လှပါ။ ခြေသည်း-လက်သည်း ကြွတက်လာတဲ့ အဆင့်ရောက်ရင် Onychomycosis လို့ ဆေးစာက ခေါ်တယ်။ နာလာ၊ အနံ့ပါရလာပြီ။ သေခြာမကုရင် တသက်လုံးလို့ ပြောရမလိုနေမယ်။
Fungus မှိုပိုးဆိုတာ မျက်စိနဲ့ မမြင်ရဘူး။ စိုထိုင်းတာ ကြိုက်တယ်။ ကိုယ့်မှာ အပေါက်-အပြဲ၊ အကွဲ-အရှ ရှိလာမှ အထဲ ၀င်လာတာ။ သူနဲ့ဆင်တဲ့ Yeasts တို့ Molds တို့ကနေလဲ ရောဂါဖြစ်ပါတယ်။ ချွေးထွက်များ သူ၊ ယောကျာ်း၊ အသက် မငယ်သူ၊ စိုထိုင်းတဲ့ အလုပ်လုပ်ရသူ၊ ခြေအိတ်-လက်အိတ် အမြဲ ၀တ်ထားရသူ၊ ဘာမှမစီးဘဲ လမ်းသွားရသူ၊ ဆီးချို ရှိသူတွေမှာ အဖြစ်များတယ်။ Leukemia, AIDS နဲ့ အင်္ဂါအစားထိုး ထားရသူတွေမှာလဲ ပိုဖြစ်တတ်တယ်။
Terbinafine, Fluconazole and Itraconazole စားဆေးတွေ ပေးတယ်။
• Terbinafine (Lamisil) စားဆေး 250 mg ကို တနေ့ ၁ လုံး၊ ဖြစ်ခဲ့တာ ကြာကြာသလို သောက်ရမယ်။ ဥပမာ ၆ ပါတ်။ ဘေးထွက်ဆိုးကျိုးတွေက ၀မ်းပျက်၊ ယား၊ အစာမကျေ၊ အနီပြင်ထွက်၊ အစားပျက်။
• Fluconazole (Diflucan) စားဆေးကို 150 mg တနေ့ ၁ လုံး၊ ဖြစ်ခဲ့တာ ကြာကြာသလို သောက်ရမယ်။ ဥပမာ ၆ ပါတ်။ ဘေးထွက်ဆိုးကျိုးတွေက ခေါင်းကိုက်၊ မူး၊ ၀မ်းပျက်၊ ယား၊ အစာမကျေ၊ အစားပျက်။
• Itraconazole (Sporanox) စားဆေးကို 200-400 mg တနေ့ ၁ ကြိမ်၊ ၂ ခါခွဲသောက်လဲ ရတယ်။ ဖြစ်ခဲ့ တာ ကြာကြာသလို သောက်ရမယ်။ ဥပမာ ၆ ပါတ်။ ဘေးထွက်ဆိုးကျိုးတွေက ၀မ်းလျှော-၀မ်းချုပ်၊ လေထ၊ ခေါင်းကိုက်၊ မူး၊ ယား၊ အစာမကျေ၊ ပါးစပ်နာ၊ သွးဖုံး သွေးယို၊ ချွေးထွက်၊ ကြွက်သားနာ၊ အတူနေခြင် စိတ်နည်း၊ စိတ်ကျ၊ နှာစေး၊ အိပ်မက်မက်။
နောက်ပိုး၀င်တာ ရှိနေရင်လဲ နောက်ဆေး ပေးရမယ်။ Ciclopirox (Penlac) ဆိုတဲ့ Antifungal nail polish ကိုလဲ သုံးနိုင်တယ်။ လိမ်းဆေး တခုထဲနဲ့ မရတတ်ပါ။ စားဆေးနဲ့ တွဲတာ ကောင်းတယ်။ သိပ်ဆိုးရင် ဖြစ်တဲ့ လက်သည်း-ခြေသည်း ခွဲထုတ်ရတယ်။ Laser လေဆာနည်း၊ Photodynamic therapy အလင်းရောင် ပေးကုနည်းတွေလဲ ရှိတယ်။
အိမ်မှာတင် လုပ်လို့ရတာတွေလည်း ရှိတယ်။ Vinegar (ဗနီဂါ) ၁ ဆ၊ ရေ ၂ ဆ ထဲမှာ ၁၅-၂၀ မိနစ်ကြာ၊ တပါတ်မှာ ၃ ကြိမ် စိမ်ထားရမယ်။ Vicks VapoRub ကိုလဲ လိမ်းလို့ရတယ်။
ခြေသည်း-လက်သည်း တိုတိုထားပါ။ ခြောက်သွေ့နေပါစေ၊ တကိုယ်ရေ-သန့်ရှင်းရေး လုပ်ပါ။ စိုတဲ့အလုပ်မှာ ရာဘာ လက်အိတ်-ခြေအိတ်သုံးပါ။ သင့်တော်တဲ့ ခြေအိတ်ရေါးသုံးပါ။ ချွေးထွက်များရင် လဲပါ။ ဖိနပ်မပါဘဲ လမ်းမသွားပါနဲ့။ Manicure and Pedicure salon လက်သည်း-ခြေသည်း အလှပြင်ဆိုင်သွားရင် နာမည်ရ တဲ့ဆိုင်သာ သွားပါ။ Nail polish and artificial nails အလှလုပ်တာ၊ အတုလုပ်တာတွေ ရှောင်ပါ။
Dr. တင့္ေဆြ